大叔觀眾戲院進食聲浪太大惹爭執　影帝梁家輝在場以呂奇腔平息紛爭

昨日（3月28日）有網民發帖，指影帝梁家輝出席一場電影播放會時，恰巧有在座觀眾，疑因不滿有其他觀眾開場前進食的聲浪太大，而互起爭執。而作為該場放映VIP觀眾的梁家輝，於是出面調停，不慍不火地平息干戈，有在座觀眾在網上分享事件，梁家輝獲網民大讚。

有網民在facebook群組「HKIFF觀影手記」發文，稱：

「今日圓方七院有花生食，最尾兩行靚位斬咗一半預留俾嘉賓，有兩位熟年觀眾一前一後坐尾兩行中間位，突然間有白頭翁炸營，話後邊嗰位老先生食嘢太大聲嘈住佢，對方不是省油的燈，話關你咩事呀？越吵越大聲，驚動成班工作人員同埋一位VIP。」

之後網友續寫：

VIP用溫柔呂奇腔善意勸解：唔好嘈啦傷和氣，睇戲係開心事，唔好將負能量帶入嚟，影響自己影響人地。

▲ 網民指梁影帝用溫柔呂奇腔化解觀眾糾紛。

開餐者好委屈，話：

你地淨係話我唔話佢，擺明欺善怕惡！VIP轉數好快：惡？邊有惡啫？你睇下我，一D都唔惡㗎！

網民稱最後該進食觀眾同意調位，願意坐在最前排。留言網民稱該VIP為梁影帝，不過亦大讚梁影帝手段一流，而帖文一出，不少人留言稱該VIP相信正是梁家輝，並讚影帝轉數快。

雖然發文樓主稱「個個趕場咁辛苦，食嘢有咩問題呢？」，不過亦大讚梁影帝公關手段一流。